هل نحن مختلفون ؟؟ أم متخلفوون ؟؟

يسعد اوقاتكم ..}-

من زمان عن المواضيع الساخنة ..



سؤال بسيط ..عفوى .. ليش نظن أن أحنا غير ؟؟

قبل تجاوبون ..أحب أقولكم بأختصار ..أنا انسانة واقعية وأكرة التنويم والطبطبة

{مهيب حقت قعقع }

شبعنا تنويم .. وشبعنا من النظارة الوردية اللي لبسونا اياها ..ودقوها

بمسامير في نوافيخنا عشان مانشوف الا منها..

شبعنا تطبيل وتصفيق ..

{ احنا الشعب الوحيد اللي يصفق لهمْ ويتصفق منهم ْ}

شبعنا من اساطير حنا غير .. وحنا فوق ..

بس المشكلة ماعلمونا ليش حنا غير وليش حنا فوق ..

شبعنا من كل آل فلان خيالة وعليهم رزة الراية ويازين محمد بينهم

..حتى لو هالمحمد سكير مايعرف الصلاة ..

وغيرك ينقص وأنت تزودي ... بس ماعرفنا وش ينقص ووش نزود ...

شبعنا - نفخ نفخ نفخ


ليش أحنا غير ...؟؟؟

فية أحد يقدر الحين يجاوب على هالسؤال الشائك ؟؟؟

حتى لو بينك وبين نفسك .. جاوبي نفسك .. جاوبي الطفلة الحنانة داخلك ..

وش يميزنا عن غيرنا ؟؟؟

لاتقولين الأسلام ... ادري هالشي مايختلف علية 2

بس هل تعتقدون ان كل من تحت راية هالدين يعملون بة؟؟؟

كم واحد تعرفينة مسلم وهو مايصلي ولا يعرف ربة ؟؟؟

وش سوينا عشان نحس أننا مختلفين عن الكل ؟؟؟

وش قدمنا لمجتمعنا ولا لبلدنا ؟؟؟


أجيال ورى أجيال يكبرون وريشة التميز فوق راسهم .. يمشى الطفل ووراة السواق والشغالة ..

وحتى لو ضربهم محد يقولة شي ..

لأنة غير.. ولين كبر حدث ولا حرج .. تكبر الريشة معه .. وتتوسع دائرة الأقزام حولة ..

يتعالى على العامل والأجير والغريب .. وياويلة ياسواد ليلة لو واحد منهم

تجرأ ووقف بوجهه ..

اول جملة تجي على لسانة }- من أنت عشان تسوي كذا ؟؟؟

وأذا كان عاقل ..قال }- البيت بيت ابونا والقوم طردوونا

شربنا التعالي .. وتغذينا بالعنصرية ..

حتى لو الواحد عاطل باطل ومر جنبة اجنبي يشتغل شغلة تفيدة

وتفيد عيالة .. رفع خشمة علية .. كنة هو اللي يصرف لة راتبة ..

صارت العنصرية سمة تلاحقنا في بلدان الغير

وصرنا لقمة سهلة لتجار الشفط لأننا عيال النفط , ولأننا نأبى التخلي عن تاريخنا العنجهي
في رحلات الترويح والتسريح والهشك بشك .. حتى لو كل الرحلة سلوف وقروض .. المهم حنا غير ..

غيرنا وصل للفضاء .. واكتشف امراض .. وصنع صواريخ وقنابل عشان نقرقش جيبونا ونشريها ..

نحتاجهم .. ونلبس منهم .. وناكل منهم ... بس نكرههم .. وقناعتنا قائمة أننا أفضل منهم ..

ولما أستشرى فينا مرض التعالي , صرنا نتعالى على بعضنا البعض ..

الغني على الفقير .. الأصيل على الأجير .. الأبيض عالأسمر ..

زرعنا الجفوة بقلوب الغير ... ومازلنا مانشوف غير القشور

تعلمنا ندفع مقابل أننا نسمع ..نسمع نفخ وتطبيل .. ومدح كذاب ..

يمكن نكون الشعب الوحيد اللي يمتلك قرائح شعرية للحلب ..

قرقش جيبك ..يقرقش الشاعر قريحتة ..

وفجأة ..بعد ماكنت سلقة تصبح أسد مغوار

صار الكل فارس الفرسان ودرع الدروع ..حتى لو كانت شحومة

تتدودل بكل أٌبهه من اطراف الكرسي , وكل مازادت الدودلة زادت القرقشة وزاد الحلب ,

وراح تزيد معها حيرتي بالجواب ...



ليش أحنا غير ؟؟؟